وجه الدكتور محمد فتحي الأستاذ الجامعي، والإعلامي المعروف، رسالة إلى متابعيه على صفحته الرسمية على “فيس بوك” حول خلاصة تجربته لخدمات شركة «أوبر» المتخصصة في تأجير السيارات للغير، وذلك بعد أكثر من عام من اعتماده عليها.
فتحي كان أحد أبرز المتحمسين لتجربة أوبر في السوق المصري حتى أنه كتب عنها مقالات وعمل عنها فقرات إعلامية عديد في البرامج والقنوات التى كان يديرها، مثل قنوات سي بي سي التى كان يرأس تحريرها في السابق، لكن يبدو أن موقفه تغير كثيرا بعد عامين فقط من تواجد الشركة في السوق المصري.
في السطور التالية نعرض الأسباب التي دفعت ” الدكتور محمد فتحي ” لتغيير موقفه “بحسب تجاربه الشخصية”.
يبدأ الدكتور محمد رسالته بمقدمة نارية، فيقول :”زي اي حاجة حلوة وبرة الصندوق ومفيدة وبتأدي خدمة حقيقية حبينا (أوبر) .. وزي أي حاجة تاخد (تاتش) مصري .. باظت بمعنى الكلمة”. مؤكدا أنه شخصيا رحب بخدمات أوبر في مصر، وقال:”لما كنت بالاقي خدمة مميزة .. دلوقت ما بلاقيهاش”.
وعدد أسباب تفضيله لخدمات أوبر في السابق، فقال”كنت بلاقي سواق محترم، وف حاله ومابيتكلمش كتير وبيستأذنك قبل ما يعمل اي حاجة، وكان بيوديني اي مكان”، ولكن يبدو أن هذا التصور أختلف كثيرا بعد انتشار الخدمة في مصر، ويشرح دكتور فتحي الأسباب”دلوقت بقى عادي السواق يكلمك ويقولك هو حضرتك رايح فين .. ولو ماعجبوش المكان يقولك طب انا مش رايح هناك .. ممكن تكنسل وتطلب حد تاني”.
وبحسب فتحي الذي أسس جمعية أسمعونا، وهي من أنشطة جميعات المجتمع المدني في مصر،”كنت احب اوبر عشان ممكن ينتظرني وياخد تمن الانتظار مفيش مشكلة .. دلوقت يقولك ماينفعش انتظر عشان مابتحاسبش على الانتظار .. أو يقولك أصل قانون اوبر ماينفعش فيه الانتظار اكتر من 10 دقايق .. كنت بافضل اوبر عشان حاسس ان سواقينه متنقيين ع الفرازة .. دلوقت السواقين أغلبهم لا فاهمين جي بي اس ولا مستواهم زي الاول”.
اقرأ أيضًا:
كيف تعامل المصريون مع Uber خلال 2016؟
ويقول أيضا أحد مؤسسي اسمعونا” كان سواق اوبر بيتميز انه مابيتكلمش .. وتجر منه الكلام لو زهقت لان متنبه عليه مايزعجش العميل .. النهاردة ركبت مع سواق ستيني بيتخانق مع مراته ويقولها انتي بتعصيني وتقولي المية مقطوعة طب انا هوريكي بس لما ينزل الزبون !!!”.
وأضاف أن “أوبر كانت خدمة واعدة جدا لما كنت تلاقي الميل اللي بتبعته أو الكومنت اللي بتسيبه بيترد عليك فيه، دلوقت فيه حالة طناش قصاد الشكاوي حتى لو كنت عميل متميز واللي بتصرفه ف اوبر يساوي قسط عربية ملاكي جديدة .. أوبر مثال للتاتش المصري لما بيدخل في الحدوتة”.
ووجه كلام لإدارة شركة أوبر في مصر قائلا “محتاجة تراجع نفسها والخدمة بتاعتها”.
وأختتم دكتور محمد فتحي، الذي كان يعمل حاليا مستشارا إعلاميا لمستشفي 57357، رسالته قائلاً:” بالمناسبة اللي كاتب الكلام ده كتب مقال يساند اوبر في بدايته ايام ماكان بيقدم خدمة حقيقية باحترافية شديدة .. وهو نفسه اللي كتب حلقة يحيي فيها اوبر في بدايته على لسان الفنان الكبير محمد صبحي في برنامج مفيش مشكلة خالص وهو بيتكلم عن التجارب اللي تستحق الدعم .. راجعوا نفسكم يا أوبر وبلاش التاتش المصري الوحش في الادارة”.
ووجدت رسالة الدكتور محمد فتحي تفاعل كبير فضلا عن قيام بعض أصدقاءه بإعادة نشر رسالته تضامناً مع موقفه بأن خدمة الشركة طرأ عليها تغيير كبير في الفترة الأخيرة وفقا لمعظم التعليقات.
